អន្តរជាតិ៖ ប្រធានាធិបតី Joe Biden បានធ្វើអធិប្បាយជុំវិញភាពតានតឹងរវាងទីក្រុងវ៉ាស៊ីនតោន និងទីក្រុងមូស្គូជុំវិញវិបត្តិអ៊ុយក្រែននឹងកើនឡើងទៅជាសង្គ្រាមនុយក្លេអ៊ែរ ដោយនិយាថាជនជាតិអាមេរិកមិនមានហេតុផលណាមួយដែលត្រូវព្រួយបារម្ភអំពីហានិភ័យនៃជម្លោះបែបនេះ។

នៅពេលសួរដោយអ្នកសារព័ត៌មានថា តើអាមេរិកគួរព្រួយបារម្ភអំពីសង្គ្រាមនុយក្លេអ៊ែរដែរឬទេ លោក Biden បានឆ្លើយយ៉ាងខ្លីថា “ទេ”។ សំណួរនេះបានកើតមានឡើងខណៈពេលដែលលោក Biden និងស្ត្រីទីមួយ Jill Biden កំពុងដើរកាត់ក្រុមអ្នកកាសែតកាលពីថ្ងៃចន្ទ ក្នុងព្រឹត្តិការណ៍ Black History Month នៅសេតវិមាន។

កាលលើកឡើងរបស់លោក ចូ បៃឌិន បានថ្លែងតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃអាទិត្យ បានដាក់កងកម្លាំងរបស់ប្រទេសលោកឱ្យប្រុងជើងការកម្រិតខ្ពស់ រួមទាំងអាវុធនុយក្លេអ៊ែរផងដែរ។

គួរបញ្ជាក់ដែរថា អាវុធនុយក្លេអ៊ែរសរុបរបស់រុស្ស៊ីមានច្រើនជាងអាមេរិកទៅទៀត ដោយរុស្ស៊ីមានមានក្បាលគ្រាប់នុយក្លេអ៊ែរសរុបប្រហែល ៦ ២៥០គ្រាប់ នេះបើយោងតាមសមាគមគ្រប់គ្រងអាវុធ ខណៈសហរដ្ឋអាមេរិកមានប្រមាណ ៥ ៥00ក្បាលគ្រាប់៕